Eerste kiewietseier bennen loat

t Was schier weer om ien buten te wezen en veul vogels zien. Eindelek wat veurjoarsweer.

Toch ien Meert nog eier vonden en de dochters ok.

Toen ik 10 joar was, von k mien eerste kieweitsei huulmoal allenneg. Dat was stoer. Grode stukken, zulf nog kleiner rondzwalkend op t laand sums zunder akkers en geuten, dat viel niet altied met. Je verloren de richteng makkelek uut t oog en doolden dan wat rond. 

k Har n kiewiet zien op n smalle streep mestlaand. Noadat ik t stuk zowat twee keer òfzocht har, nog niks vonden. k Wol nog een keer t mooie fopnustje zien, dat zo mooi met stro bekleed was. t Lag wat vedderop bij die mollebult. t Viel òf om t nust weer te vienden, want der bleken veul meer mollebulten te wezen. Zo liep ik wat hinneweer. Toen zag k n aander nustje met wat donkers diep ien t kuultje haalf onder t stro: n ei!

Meertmoand Dialectmoand - Veurdracht ien de Pervincioale Stoaten

Òflopen woensdag 14 meert har k prissentoatsie ien de Pervincioale Stoaten.

Twee gedichten he'k veurdroagen: Over Laand en Licht en Exercities met n Mes. Beident uut de tweede dichtbundel Zolt en Stof.

 Hieronder de veurdracht met zicht op de zoal.

t Gedicht Over Laand en Licht is hier noa te lezen. 

Westerkertierder gedichten ien de Pervincioale Stoaten

t Is Meertmoand Dialectmoand - ok veur de Pervincioale Stoaten. Woensdag vittien meert was et tied om gedichten veur te droagen ien de vergoadereng van de Pervincioale Stoaten.

Kommissoares van de keuneng René Paas bij de veurdracht Exercities met n mes. Foto: Tea Wieloch.

t Gedicht Exercities met n Mes gijt over t mes dat an twee kanten snidt. De PS-leden kregen twee vroagen veurleid. Alle PS-leden bleken t mes te kennen, zowat gieneent het t ien huus.

Laandschapsscheuvelrieder

k Wiet et, ik wiet et. t Is nou veurjoar. Dat, wat zel dat nog met zukse winterbeelden?
Mor de Lauwers blift n mooi wotter, veur veul minsen onbekend. Scheuvelrieden op de Lauwers belukt ok niet elke vorstperiode. Doarveur is t Wetterskip ien Fryslan te weineg begoan met dizze mooie contreien en wordt t wotter te veul en te gaauw moalen. 
Mor verleden week met aal dat winterweer kon et toch even: op plakken kommen, doar je normoal niet kommen kennen.

De Lauwers richting Sarabos. Foto: Willem Tjebbe Oostenbrink

Vogels vliegen richteng Sarabos. Foto: Willem Tjebbe Oostenbrink

Piederzielsterdiep richteng Muntjeziel. Bij t huuske komt de Zuderriet op t diepke uut.

Voak worden bij scheulvelrieden de liefhebbers opdeeld ien kunsties en noatuuries. Mor as k zo onneer, dan zol men denken kennen, da'k goed scheuveln ken. Volgens mij is dat niet zo. Doarom he'k n poar minsen mor zeid dat k laandschapsscheuvelrieder ben.

Eenden, oalscholvers, wotterpiekjes, meerkoeten en nog wat torenkraaien.

Toen k weer thuus was, vernam ik da'k niet veur ale vogels op pad hoef. Ien eigen dörp bleek n vogelkonferentsie te wezen.

Ommelaandse reis ien Westerkertierder poëzie - 17 meert ien Stad

Twee dichters prissenteren op 17 meert ien Stad t Westerkertier vol varioatsie en ien aal heur verscheidenheid. 

Verhoalen, poëzie en beelden passeren de revue. Ze stoan open veur vroagen en kommentoar uut t publiek. 

Beident kommen ze van oorsprong uut Gruupskerk en schrieven ze ien t Westerkertiers. Ien t blad Moi stijt interview met beide dichters: Moi - Blad van de Dag van de Grunneger Toal. Kiek mor even op bladzieden 6-7. 

Are Meijer (1958) gaf de bundels Lösloatn en Keern uut. Hij schrift proza, poëzie en liedteksten, en won ien 2016 de Freudenthalpries veur nije Nedersaksische literatuur.

Willem Tjebbe Oostenbrink (1963) gaf zien poëziedebuut Opdreugde troanen uut ien 2013. Verleden joar verscheen de tweede dichtbundel Zolt en Stof (Vliedorp Houwerzijl 2017). Hij ontvong de Duutse Borslapries (2014) en de Johann Friedrich Dirkspries (2017).

Wanneer: 17 meert 2018

De prissentoatsie wordt twee keer holden: 11.30 – 12.00 uur en 12.30 – 13.00 uur

Woar:  Adres: Cascadeplein 4 ien Stad (5 minuten loopòfstaand van station)

Cascadegebaauw ien Stad ien de Stilteruumte noast de Toalmaart

Toegang: vergees.

Meer ienformoatsie:

Over Are Meijer: De tekstdichter.

Pregrammoa op webloug: Dag van de Grunneger Toal - pregrammoa.

Kramsvogel ien winterweer

De vogels hemmen t zwoar met dizze winterdoagen. Guster zag k twee holtsnippen votvliegen, zo uut n leste wotterstroomke bij n brugje tussen de huzen midden ien dörp. Kolle moakt dieren mak. Ze zoeken bij dizze schroale wiend de leite van huzen en brugjes. Vogels kennen niet makkelek meer an eten kommen, zoeken de leste bessen van hegen en struken.

Zo ok dizze kramsvogel gusteroavend bij ondergoande zun, pikkend an de leste zwaadde bessen van de ligusterheeg. Vanmörgen zag k hum over n hek zoeiernd votvliegen, wat minder koersvast.

Winter

Strenge winters kommen en goan geregeld. Allenneg is de moat ien de regel voak ver te zoeken ien de komst van strenge winters. Dizze winter roept toch herinneringen wakker van '79. Of toen ien '87 toen t aldernoaste kold was, met n haarde wiend, die deur merg en been ging.

Ien '79 vroor t zo haard ien buten, mor ok ien de boerderij, dat de eier van e pieken ien de hut kepot vroren. As t haard genog vrust, dan barst de schoal n keer open.

Nou har k vanmörgen ok n bevroren ei van n krielpiek, die met zien glenrooie kam niet van opholden wiet. t Ei is de nacht niet goed deurkommen.

Vanmirreg he'k nog mor wat stro ien de legkasten stopt. Dan kennen de pieken nachts de waarmte beder vastholden as ze aalmoal tegen nkander aankrupen.