Der is n nij bret met de tekst "Kiek ien e pot". Dat dut me deugd. Zo nou en dan loop k rondje Zuderweg. En zo trof k dit bret an bij haarfstdag. t Stijt niet ver vanòf Eemtil, doar woar de Zuderweg uutkomt op Hoendiep.
"Kiek ien de pot" was ien e volksmond de noam van de boerderij die doar stoan het. t Achterenne van e schuur en de hut stonden stief op t wotter. Minsen die per snik veurbij voeren of met peerd en woagen del kwammen, konden as deuren open stonden, zo ien e pot kieken.
Ien e joaren zeuventeg is boerenploats òfbroken. Een van de leste kiender die doar geboren is, kwam loater ien e buurt van Gruupskerk te wonen. Doar woonde er met zien gezin; zien vraauw har dezulfde achternoam. Da's weer aander nijs as over Ed Sheeran, Bieber en Swift.
t Is ook t plak woar volgens overlevereng mien overgrootvoader met de snik uut Vrieslaand aankwam. Doar leide hij an om noar t Zuden te goan - de Zuderweg onder Zuudhörn. Met levende hoave en goed over t sintelpad dat de Zuderweg toen nog was, kwam hij as meier op de boereploats 'de Hoogte'. We hemmen t over t joar 1899. Warschienlek de meimoand, dat was de tied dat nije grond vannijs aan meijer verpacht wer.
Nou stoan der nog wat elderbomen en misschien n prumeboom.
Geen opmerkingen:
Een reactie posten